Test i Shpejtësisë së Internetit
Mat shkarkimin, ngarkimin dhe ping-un e lidhjes sate — falas, në rreth 30 sekonda.
Testi zgjat rreth 20–40 sekonda. Me të dhëna mobile përdor deri në rreth 170 MB, në WiFi ose kabllo të shpejtë më shumë. Rezultati ruhet anonimisht, pa adresën IP.
Krahaso internetin dhe paketat celulare
Nëse interneti yt është më i ngadaltë se sa të duhet, krahaso paketat e të gjithë ofruesve në Kosovë sipas shpejtësisë dhe çmimit.
Pyetje të shpeshta për testin e shpejtësisë
Si funksionon testi i shpejtësisë së internetit?
Testi mat sa shpejt shkarkon (download) dhe ngarkon (upload) pajisja jote të dhëna nga serveri më i afërt i Cloudflare, si dhe sa shpejt përgjigjet lidhja (ping). Shkarkohen dhe ngarkohen skedarë gjithnjë e më të mëdhenj derisa lidhja të arrijë kufirin e saj — kështu rezultati tregon shpejtësinë reale që po merr në këtë moment.
Pse rezultati është më i ulët se shpejtësia e paketës sime?
Shpejtësia e paketës është maksimumi deri te ruteri. WiFi-ja, muret, distanca nga ruteri, pajisjet e tjera që përdorin internetin njëkohësisht dhe ora e ditës e ulin shpejtësinë që arrin te telefoni apo kompjuteri. Për rezultatin më të saktë, lidhu me kabllo direkt te ruteri dhe mbyll aplikacionet e tjera.
Çfarë janë ping-u dhe jitter-i?
Ping-u është koha (në milisekonda) që i duhet një sinjali të shkojë te serveri dhe të kthehet — sa më i ulët, aq më mirë për lojëra online dhe video-thirrje. Jitter-i tregon sa ndryshon ping-u nga njëra herë te tjetra; një jitter i lartë shkakton ndërprerje në thirrje dhe lojëra edhe kur shpejtësia është e mirë.
Sa të dhëna mobile shpenzon testi?
Me të dhëna mobile testi përdor nga rreth 20 MB (lidhje e ngadaltë) deri në rreth 170 MB (4G/5G shumë i shpejtë) — sa më e shpejtë lidhja, aq më të mëdhenj skedarët e testit. Nëse ke pak MB në paketë, bëje testin në WiFi. Në WiFi ose kabllo shumë të shpejtë testi mund të përdorë deri në rreth 400 MB.
A ruhen të dhënat e mia?
KOS24 ruan vetëm rezultatin në mënyrë anonime: shpejtësitë, ping-un, rrjetin (p.sh. IPKO), qytetin e përafërt dhe llojin e lidhjes — kurrë adresën IP apo të dhëna personale. Këto përdoren për statistika si shpejtësia mesatare sipas ofruesit dhe qytetit. Matja kryhet me serverët e Cloudflare, të cilët gjithashtu regjistrojnë rezultatin për statistikat e tyre të cilësisë së internetit.
Sa shpejtësi interneti më duhet?
Për email, rrjete sociale dhe video HD mjaftojnë 10–25 Mbps. Për streaming 4K, punë nga shtëpia dhe disa pajisje njëkohësisht, rekomandohen 100 Mbps ose më shumë. Për ngarkimin e videove apo kopje rezervë në cloud, vlen të shikosh edhe shpejtësinë e upload-it.